Ferðavinnufelagið: Elrennihjól skulu vera loyvd

Ferðavinnufelagið heldur ikki, at forboð skal setast fyri at brúka elrennihjól á almennum vegi.

Landsstýrið ætlar at seta hetta forboðið í ferðslulógina.

Men Ferðavinnufelagið mælir tó heldur ikki til fullkomið loyvi.

Loyvi skal bara vera at brúka elrennihjól, sum fáast til leigu, sigur felagið.

Ferðavinnufelagið heldur, at tað er neyðugt at leggja dent á loysnir, heldur enn at seta forboð.

Fleiri súkklubreytir

Felagið mælir til at gera fleiri súkklubreytir fyri at fáa eitt tryggari vegakervi. Og súkkluhjálmur skal vera kravdur.

At koyra uttan hjálm skal kosta 1500 krónur í sekt, sigur Ferðavinnufelagið.

Aldursmarkið skal vera 15 ár, og bara eitt fólk kann vera á elrennihjóli.  

Útleigari skal tekna ábyrgdartrygging.

Elrennihjól skal hava ljós bæði framman og aftan alt samdøgrið, sigur Ferðavinnufelagið í sínum hoyringarsvari.