Svøríki gevst at kanna atsókn at NordStream-leiðing

Kanningararbeiðið í sambandi við atsóknina at NordStream-gassleiðingini heldur nú uppat.

Tað boðar svenska ákæruvaldið frá í dag.

Svenska trygdarløgreglan hevur í 16 mánaðir kannað málið um atsóknina í Eystrasalti. 

Fáar upplýsingar

Men nú verður givist við kanningararbeiðnum. 

Svøríki, Danmark og Týskland hava kannað spreingingarnar út fyri Bornholm, sum oyðlegði báðar rørleiðingarnar í september 2022. 

Men higartil eru fáar upplýsingar um, hvat er komið undan kavi í kanningararbeiðnum.

Týskarar halda fram at kanna

Týska kanningararbeiðið heldur tó fram, sigur svenski ríkisákærin, Mats Ljungqvist.

- Týsku undankanningarnar halda fram, og av tí at kanningarnar verða hildnar loyniligar, fái eg ikki sagt meira. Og tí fái eg heldur ikki viðmerkt meira um niðurstøðuna í svenska kanningararbeiðnum ella viðmerkja um møgulig fólk, sum eru undir illgruna í svenska kanningararbeiðnum, sigur Ljungqvist.

Sambært lekum til týskar miðlar, vísa fleiri slóðir á Ukraina.

Ukraina hevur hinvegin skuldsett Russland fyri at hava framt álopið, skrivar NTB.