Tilmæli um sjúkraflutning kemur í summar

Sjúkraflutningstænastan í øllum landinum verður enduskoðað í løtuni.

Eitt tilmæli um dagførig verður latið Sjúkrahúsverkinum í summar.  

Brúk er fyri einari endurskoðan, nú undirstøðukervið er nógv broytt, síðani Eysturoyartunnilin  og Sandoyartunnilin eru komnir.  

Tað sigur Margit Stórá, landsstýriskvinna, í svari til Jacob Vestergaard, tingmann, sum spurdi um 
sjúkraflutningstænastuna í Sandoynni.

Óvissa eftir 31.mai

Landsstýriskvinnan svarar, at tænastan í Sandoynni er við í endurskoðanini, sum nú er.

Í løtuni hevur sjúkraflutningstænastan í Landssjúkrahúsinum avtalu við ein privatan veitara um sjúkraflutning í Sandoynni. Hon er galdandi til 1.juni í ár.

Landssjúkrahúsið sendir boð eftir sjúkrabilinum, og heldur við líka bil og útgerð.

Tá starvsfólk í sjúkraflutningstænastuni fáa undirvísing, fevnir hetta eisini um starvsfólk í  Sandoynni.  

Enn er ikki greitt, hvussu verður við sjúkraflutningstænastuni í Sandoynni eftir 31.mai, sigur Margit Stórá, landsstýriskvinna.