Endurgjald fyri jørð verður nú endurskoðað

Hóast prísirnir eru teir somu í kunngerðini um landsjørð frá 2007, helt Fiskimálaráðið í 2019, at teir vóru í lagi.

Men Uttanríkis- og Vinnumálaráðið er nú saman við Búnaðarstovuni farið undir at endurskoða kunngerðina.

Tað sigur Høgni Hoydal, landsstýrismaður, í svari til Bárð á Lakjuni, løgtingsmann, sum spurdi um endurgjald fyri mist bit og mist slóttulendi.

Stórt arbeiði

Talan er um stórt arbeiði - at endurskoða kunngerðina -  sum partvíst er knýtt at komandi landbúnaðarpolitikkinum.

Tí fær Høgni Hoydal ikki sagt, nær endurskoðanin verður liðug. 

Hann sigur, at jarðarbrúk kostar meira nú, eins og alt annað.

Tí er ivaleyst ósamsvar millum galdandi reglur um endurgjald og veruliga kostnaðin, sigur hann.