Hondbóltur: Turið aftur á landsliðnum

Turið Arge Samuelsen er aftur á hondbóltslandsliðnum, sum skal spæla EM-undankappingardyst ímóti Svøríki mikukvøldið, og hon gleðir seg.

 - Tað er ordiliga deiligt. Vit hava nakrar spennandi dystir fyri framman, og eg eri bara glað fyri at vera við, sigur hon.

Sterki Kyndilsspælarin var ikki við til dystirnar ímóti Luksemburg. Júst hvat orsøkin var, er ikki heilt greitt, men nú eru allar ósemjur lagdar til viks, og Turið Arge Samuelsen verður aftur í hvítum til avgerandi dystirnar ímóti Svøríki og Íslandi. 

 - Eg og landsliðsvenjarin hava havt eitt gott prát, og vit bæði hava altíð havt ein góðan dialog, sigur Turið Arge Samuelsen.

 - Vit bæði prátaðu saman og komu til ta niðurstøðu, at vit skuldu prøva at fara allan vegin, nú vit skulu til Íslands og taka ímóti Svøríki.

Somu treytir fyri allar

Treytirnar eru tær somu fyri allar spælararnar, staðfestir landsliðsvenjarin, Claus Mogensen.

 - Tú skalt vera motiveraður og veruliga vilja vera við á landsliðnum, og tað vil hon, og so er hon við, sigur hann.

Turið Arge Samuelsen hevur leingi spælt á bakkinum fyri Kyndil, men á landsliðnum hevur hon verið á vinstra vongi higartil. Nú koma føroysku viðhaldsfólkini helst at síggja hana á báðum plássunum. 

 - Eg komi primert at spæla vongur. Tað hava vit tosað um, og tað er í fínasta ordan, men so hava teir hugsað, at vit kunnu hava onkrar loysnir, um tað steðgar upp. Tá hava vit brúkt meg í bakkketuni, greiðir Turið Arge Samuelsen frá.

 - Hon hevur ein ekstraordineran kvalitet í eksplosiviteti og lopstyrki, sum kunnu bjóða málverjunum hjá Svøríki av. So vit koma at síggja hana nógv á vonginum, men eisini í løtum á bakkinum, sigur landsliðsvenjarin.