Ursula von der Leyen undir trýsti

ES-nevndarforkvinnan, Ursula von der Leyen, er komin undir politiskt trýst.

Tað hendir eftir, at tað er komið undan kavi, at hon fyrr í ár tilnevndi ein politiskan floksfelaga til nógv eftirspurt starv, framum aðrar betri skikkaðar umsøkjarar.

Tað skrivar danska kringvarpið.

Talan er um týska ES-tingmannin Markus Pieper, sum eins og Ursula von der Leyen er úr kristinkonservativa CDU-flokkinum.

Í januar fekk hann starvið sum ES-umboðsmaður fyri smáar og millumstórar fyritøkur, og mánaðarlønin hjá honum er slakar 150.000 kr.

Talan er um nýtt starv, sum Ursula von der Leyen almannakunngjørdi í árligu ES-røðu sínari í fjør.

Málið hevur fingið fýra av mest navnframu kommisserunum at krevja frágreiðing frá Ursulu von der Leyen.

Málið kemur illa við hjá ES-nevnfarforkvinnuni, sum ætlar at taka eitt formansskeið aftrat, tá ið hetta formansskeiðið er runnið seinni í ár.

Stjórnarleiðararnir í ES tilnevna næsta ES-nevndarforfólkið, sum síðani skal góðkennast av einum meiriluta í ES-tinginum.

Val er til ES-tingið í ár. Í Danmark er valið 9. juni.