Hvalba og Fámjin taka støðu til fólkaatkvøðu um kommunusamanlegging

Mikukvøldið fæst at vita, um vegleiðandi fólkaatkvøða um kommunusamanlegging verður í teimum trimum norðastu kommununum í Suðuroynni.

Eyka bygdaráðsfundir verða bæði í Hvalba og Fámjin næstu dagarnar. 

Eittans mál er á skránni á báðum fundum: Kommunusamanlegging og vegleiðandi fólkaatkvøða.

Eyka bygdaráðsfundir verða  í Hvalba í annaðkvøld og í Fámjin mikukvøldið.

Mæla til at leggja saman

Ein arbeiðsbólkur, sum hevur arbeitt við at kanna vansar og fyrimunir við samanlegging av kommununum í Suðuroyar norðaru helvt, legði í mars fram úrslitið av arbeiðinum. 

Niðurstøðan hjá arbeiðsbólkinum er, at mælt verður til, at Fámjins-, Tvøroyrar- og Hvalbiar kommunur leggja saman.

Eitt samt býráð á Tvøroyri hevur longu tikið undir við, at fólkaatkvøða skal vera í kommununi um kommunusamanlegging.