Rock Trawldoors: Úr Vági til Thyborøn

Føroyska felagið Rock Trawldoors við heimstaði í Vági er nú selt. Keyparin er danska felagið Thyborøn Trawldoor. Tað skrivar fiskerforum.com. 

Sølan er komin í lag eftir fyrispurning frá danska felagnum, sigur Petur Kjærbæk, sum er stjóri í Rock Trawldoors og ein av teimum sjey eigarunum, sum nú hava selt. 

- Tað kom ein fyrispurningur frá donsku fyritøkuni Thyborøn Trawldoor, og vit hava verið í samráðingunum í einar tvær, tríggjar vikur. Tá nú fyrispurningurin kom frá einari fyritøku, sum ger somu vørur, sum vit gera, kendi eg, at løtan var tann rætta, sigur Petur Kjærbæk, stjóri. 

Orsøkin var eisini tann, at føroyska fyritøkan er lítil, marknaðurin minkar, og aktørarnir vaksa. 

- Vit eru ein lítil fyritøka, og tað er tungt og strævið. Vit kunnu fáa góða hjálp frá teimum á økjum, har tey eru sterk og vit veik, sigur Petur Kjærbæk.

Men ein tann týdningarmiklasti parturin var, at framleiðslan og virkið í Vági kann halda fram eins og áður. 

- Tað at framleiðslan kann halda fram í Vági, tað vigar nógv. Rock Trawldoors kemur at halda fram sum eitt sjálvstøðugt felag, og tað verða ongar broytingar í hvørki leiðslu ella starvsfólkahópi, leggur Petur Kjærbæk, stjóri, afturat. 

Sambært heimasíðuni hjá Rock Trawl Doors arbeiða 17 fólk í fyritøkuni.

Partarnir eru samdir um ikki at upplýsa keypsprísin.