Vinnunevndin ger kanska onkrar broytingar í tøkugjøldunum

Onkrar broytingar verða kanska gjørdar í uppskotinum um tøkugjøldini í alivinnuni, men tøkugjøldini og serskattaskipanin verða viðgjørd hvør sær, hóast Fíggjarmálaráðið hevur mælt frá tí.

Løgtingið viðgjørdi í gjár uppskotið hjá samgonguni og Sambandsflokkinum um tøkugjøld, og uppskotið er nú farið í vinnunevndina.

Nýggja skipanin skal vera ein tøkugjaldsstigi, sum er lægri enn í dag, men í staðin skal ein serskattur leggjast á alivinnuna upp á átta prosent. 

Bakkafrost, aliringar í Froðba, Bakkafrost í Froðba

Vinnunevndin fer nú at viðgera uppskotið um tøkugjøld í alivinnuni. 

Serskattaskipanin er ikki klár enn og verður løgd fyri tingið i heyst.

Í sínum hoyringarskrivi mælir Fíggjarmálaráðið til at viðgera serskattin og tøkugjøldini saman, tí nógv ivamál eru, og tey kunnu loysast best, um øll skipanin verður viðgjørd undir einum.

Erhard Joensen, formaður í vinnunevndini, sigur, at tøkugjald og serskattur verða viðgjørd hvør sær, men kanska verða onkrar broytingar gjørdar í nevndini.

Hoyr samrøðu við Erhard Joensen í útvarpstíðindunum: