Yvirlit: Hesi sleppa at fylla brennievni á bilin

Verkfallið hjá arbeiðarafeløgunum hevur við sær, at nú eru diesel og og bensin kring landið farin at ganga undan.

Á heimasíðunum hjá Effo og Magn sæst, at tað er bert í Vestmanna, Miðvági, á Sandi og í Suðuroynni, at nakað brennievni er at fáa.

Arbeiðarafeløgini geva javnan undantøk til summi av teimum, ið venda sær til teirra.

- Men grundgevingin skal vera góð, sigur Heri Reynheim, formaður í Havnar arbeiðarafelagi.

Skal standa um lív og heilsu

Undantøk verða fyrst og fremt givin til tey, ið arbeiða við lívi og heilsu. Hetta er eitt nú:

- Bilar hjá eldrarøktini

- Sjúkrabilar og læknabilar

- Bilar hjá sløkkiliðnum

- Líkvognar

- Bilar hjá Kringvarpinum

- Aðrir bilar, sum eru partur av tilbúgvingini

Tað kann koma upp á tal, at starvsfólk í heilsuverkinum eisini kunnu fáa undantak at keypa brennievni. Enn er tó eingin slík umsókn um undantak komin, sigur Heri Reynheim.

Bilarnir hava fullan tanga

Enn eru ikki nógvar umsóknir um undantøk komnar frá privatfólki, tí goymslurnar júst nú fara at ganga undan. Í fleiri dagar hava fólk fylt sær upp í tangar og dunkar, og tí fer trotið á brennievni ikki at merkjast enn.

- Eg haldi ikki, at tað í nýggjari tíð hava verið so nógvir fullir bensin- og dieseltangar. Tað er eingin neyð beint nú, sigur Heri Reynheim

Ikki oyðsla við mati og brennievni

Sambært formanninum í Havnar arbeiðarafelagi, skulu fólk ikki oyðsla við mati og brennievni í næstum, tí eingin veit, hvussu drúgt verkfallið verður.

- Vit vilja heita á fólk um at brúka vit og skil, og ikki koyra óneyðugt. Serliga um tú hevur eina ella aðra ábyrgd, sum er knýtt at tanganum.

Enn er langt millum sáttmálapartarnar, og tí mugu fólk brynja seg við toli, sigur Heri Reynheim.

Hoyr Hera Reynheim greiða frá: