Havnar arbeiðskvinnufelag í verkfall á midnátt

Á midnátt fer Havnar arbeiðskvinnufelag í verkfall.

Semingsmaðurin, Terje Sigurðsson, boðaði sunnukvøldið Føroya arbeiðsgevarafelag og Havnar arbeiðskvinnufelag frá, at Semingsstovnurin gavst við semingsroyndini uttan at leggja fram semingsuppskot.

Stutt eftir boðaði Havnar arbeiðskvinnufelag frá arbeiðssteðgi, sum er lýstur at koma í gildi á midnátt í kvøld.

Arbeiðssteðgurin fevnir um allar limir í Havnar arbeiðskvinnufelagi, sum eru settir eftir sáttmála millum Føroya arbeiðsgevarafelag og Havnar arbeiðskvinnufelag, har møgulig skrivlig avtala ikki er gjørd um undantak.

Havnar arbeiðskvinnufelag hevur samráðst fyri seg, og ikki saman við Føroya arbeiðarafelag, Havnar arbeiðarafelag, Klaksvíkar arbeiðskvinnufelag og Klaksvíkar arbeiðsmannafelag, sum á midnátt høvdu verið í verkfalli í tvær vikur.