Eitt ár og fýra mánaða fongsulsrevsing fyri óviljað manndráp

Ein 19 ára gamal maður er í einum dómsmansrætti í Føroya Rætti í dag dømdur eitt ár og fýra mánaða fongsulsrevsing fyri óviljað manndráp í sambandi við rúsevniskoyring.

Ferðsluvanlukkan hendi um kvøldið tann 19. august 2022 í Jóannesar Paturssonargøtu í Havn.

Ein 75 ára gamal maður var á veg yvir um vegin við ein gonguteig, tá ið hann var árendur. Blóðroyndir, ið vóru tiknar av ákærda, vístu, at ákærdi hevði eitt hækkað virði av THC í blóðinum, ið er mett at vera vandamikið fyri ferðslutrygdina.

Fýra mánaðir eru treytaleysir

Føroya Rættur viðgjørdi málið í vikuni, og í dag avgjørdi dómsmansrætturin, at tann 19 ára gamli maðurin skuldi dømast eitt ár og fýra mánaða fongsulsrevsing.

Teir fýra mánaðirnir eru treytaleysir

Maðurin var eisini dømdur koyriforboð. Hann skal gera samfelagstænastu í 200 tímar og vera undir eftirliti av Kriminalforsorgini í royndartíðini.

Maðurin tók við dóminum.