Mallorka-búgvar mótmæla nógvu ferðafólkunum

Íbúgvar við suðurstrondina í Mallorka mótmæla nú nógvu ferðafólkunum, sum dagliga vitja strondina.

Hvønn dag koma umleið 4.000 ferðafólk oman á strondina í víkini Caló des Moro. 

Mótmælisfólkini heittu á myndugleikarnar um at avmarka talið á vitjandi á strondini. 

Á henda hátt fáa íbúgvar møguleikan at njóta strondina, sum er víðagitin fyri sín vakurleika og reina hav.

Mótmæli hava eisini verið á øðrum vælvitjaðum ferðamálum í Spania í ár, eitt nú í Kanariuoyggjum. 

Ferðavinnan er høvuðsvinnan, men nógvir íbúgvar halda, at nú eru ov nógv ferðafólk.

Ein íbúgvi í býnum Santanyi, sum var við í mótmælinum, sigur, at hann er ikki ímóti ferðafólki, og at nógv fólk liva av inntøkum frá henni. 

- Vit eru ímóti ídnaðarferðavinnu, hópferðavinnu, sum oyðileggur oynna, íbúgvar og bygningar, og tí eru vit her, sigur hann.