EM: Bridgekvinnurnar tveir sigrar higartil

Føroyska bridgelandsliðið við kvinnum er komið væl frá byrjan í EM-kappingini, sum er í Herning í hesum døgum.

Við góðum spæli hava føroysku kvinnurnar vunnið ímóti bæði Italia og Ungarn higartil í kappingini, har 21 lond kappast tilsamans, skrivar Bridgesambandið.

 - Nógvir dystir eru eftir, men longu nú halda vit, at úrslitini eru góð, og at tað er rætt, at Føroya Bridgesamband hevur sent kvinnulandslið til EM, sigur Óli Holm, sum er liðskipari.

Tað eru 20 ár síðan, at landsliðið við kvinnum var við til EM seinast.

Trý føroysk bridgelandslið eru við í EM-kappingini. Umframt kvinnurnar er opið lið, sum er tað besta liðið, og so veteranliðið, sum er liðið hjá spælarum eldri enn 64 ár.

Opna liðið liggur eitt sindur undir miðjuni í teirra raði, meðan vetaranlandsliðið eigur nøkur góð úrslit til góðar – liðið er á aftasta plássi.

Spæld vera tríggjar ferðir 16 spøl hvønn dag, og kappingin endar hósdagin.