Fyritøkur vilja hava betri møguleikar at útflyta vørur og tænastur

Føroyskar fyritøkur vilja hava fleiri og betri møguleikar at útflyta sínar vørur og tænastur. 

Tað vísir nýggj spurnakanning hjá Vinnuhúsinum.

Tey, sum útflyta fisk, vilja hava betri marknaðaratgongd, bæði viðvíkjandi tolli og heilsufrøði.

Tey, sum útflyta tænastur, vilja hava fleiri tvískattasáttmálar.

Føroyar útfluttu vørur fyri 12,7 milliardir krónur í fjør, og í 2022 útfluttu vit tænastur fyri tríggjar milliardir krónur, sigur Vinnuhúsið. 

150 milliónir eyka

Vinnuhúsið sigur, at fyri hvørt prosent, sum okkara miðal søluprísir vaksa, gevur tað føroyska samfelagnum 150 milliónir krónur í eyka inntøkum um árið.

Í ávísum førum hava Føroyar nógv verri treytir enn kappingarneytarnir at útflyta vørur og tænastur.

Serliga er hetta galdandi fyri alilaks og uppsjóvarfisk.

Føroyskir útflytarar vilja fáa betri atgongd til Kina, Suðurkorea, Japan og India.

Og saltfiskavinnan vil sleppa at útflyta til Brasil, sigur Vinnuhúsið.

Tað sigur eisini, at fáir tvískattasáttmálar forða føroyingum í at kappast um arbeiði uttanlands. 

Les uppritið her.