Ungarn mælir Ukraina til skjóta vápnahvíld við Russland

Ungarski forsætisráðharrin, Viktor Orban, er á vitjan í ukrainska høvuðsstaðnum Kyiv í dag, har hann hevur hitt ukrainska starvsbróðurin, Volodymyr Zelensky.

Á felags tíðindafundi heitti Orban á Zelenkyj um at umhugsa eina skjóta vápnahvíld við Russland, skrivar Reuters.

Ungarski forsetin heldur, at ein vápnahvíld fer at fáa gongd á friðarsamráðingar við Russland.

Viktor Orban segði eisini, at Ungarn vil hava betri viðurskifti við Ukraina, og Ungarn er til reiðar at hjálpa Ukraina at nútímansgera búskapin. 

Hevur formansskapin í ES

Ungarn hevur í løtuni formansskapin í ES, og hetta er fyrstu ferð, at Viktor Orban vitjar Ukraina.

Viðurskiftini millum Ungarn og Ukraina hava ikki verið góð, síðani Russland gjørdi innrás í Ukraina. 

Viktor Orban er ivasamur í spurninginum um, at Ukraina skal fáa limaskap í ES, og hann hevur eisini verið ímóti, at ES stuðlar Ukraina.