Blámusoppur á Tjóðsavninum - neyðugt við eykajáttan alt fyri eitt

Neyðugt er sum skjótast at flyta forngripirnar í goymsluni hjá Tjóðsavninum í annan bygning, eftir at ógvusligur blámusoppur er staðfestur í bygninginum.

Tí eru limirnir í fíggjarnevnd løgtingsins bidnir at koma á fund fríggjadagin at játta 1,4 milliónir krónur til at reinsa gripirnar fyri blámusopp. 

Neyðugt við fíggjarnevndarskjali. 

Eitt fíggjarnevndarskjal er eitt skjal, ið verður latið fíggjarnevndini, tá ið løgtingið ikki er saman, og tá mett verður, at eitt mál hevur skund. 

Sambært fíggjarnevndarskjalinum hevur málið skund, tí støðan við blámusoppi á goymsluni versnar fyri hvønn dag, og gripirnir fáa varandi skaða. 

Starvsfólk á Tjóðsavninum fáa heldur ikki arbeitt inni á goymsluni, og goymslan er nú læst. 

Soppavøkstur sæst á gripunum

Sambært skjalinum, er soppavøksturin so ógvusligur, at hann er sjónligur á gripunum.  

- Tað er tí bráðneyðugt at fáa gripirnar út úr goymsluni, reinsaðar og fluttar í aðra goymslu, eitt nú í goymsluna hjá Tjóðsavninum í Smiðjugerði í Havn. Alneyðugt er, at farið verður undir arbeiðið beinanvegin, og at farið verður eftir teimum viðkvæmastu gripunum fyrst, verður staðfest í skjalinum. 

Arbeiðið at reinsa goymsluna og tryggja gripirnar verður mett at kosta 3,2 milliónir krónur næstu trý til fýra árini. 

Tørvur er alt fyri eitt á 1,4 milliónum krónum til útgerð, einum konservatori og tveimum hjálparfólkum aftrat verandi starvsfólkum, so arbeiðið kann byrja beinanvegin.

Fingu heilsutrupulleikar

Málið hevur sín uppruna í, at Tjóðsavnið fyrr í ár kunnaði Almanna-og mentamálaráðið um, at starvsfólk á Tjóðsavninum, ið arbeiða á goymsluni, fingu trupulleikar við heilsuni, tá ið tey høvdu verið inni á goymsluni. 

Sjúkueyðkennini góvu ábendingar um blámusopp, og tí var ein luftgóðskukanning gjørd á goymsluni. 

Úrslitini í januar vístu ógvusligan soppavøkstur á veggunum og í luftini. Nýggjar kanningar í mars vístu, at hóast stig vórðu tikin til at vaska blámusoppin burtur, var framvegis tilgongd av soppavøkstri.