17 demokratar hava tikið stuðulin til Biden aftur

Higartil hava 17 demokratar tikið sín stuðul til Joe Biden, forseta, aftur - 16 í Umboðsmannatinginum og ein í Senatinum.

Tað verður tó ikki bara sum at siga tað, um hesi vilja hava Joe Biden at taka seg aftur sum valevni. Biden hevur longu vunnið undanvalini sannførandi, og tí er tað mestsum bara upp til Biden sjálvan at gera av, um hann vil halda fram ella ikki.

Um hann sjálvur velur at taka seg aftur, skulu tey, sum eftir undanvalini hava givið Biden sín stuðul, finna okkurt annað valevni at stuðla. Og tað kann enda sum ein stórur politiskur ruðuleiki, tí so skal ein nýggj demokratisk floksráðstevna finna fram til nýggj valevni.

Ein annar møguleiki er, at Biden sjálvur vísir á varaforsetan Kamalu Harris sum fremsta valevni.

Kamala Harris, Joe Biden

Joe Biden og Kamala Harris.

Verður ikki av sær sjálvum forsetavalevni

At hon er varaforseti, merkir tó ikki, at hon av sær sjálvum verður valevni, um Biden tekur seg aftur. Hon hevði tá skulað fingið undirtøku frá demokratisku floksráðstevnuni júst sum øll onnur valevni.

Men munurin hevði verið, at pengarnir, sum Joe Biden hevur savnað inn til sítt valstríð, av sær sjálvum høvdu farið til Harris, tí hon stillar upp saman við Biden, og hevur tí eisini rætt til hesar pengarnar.

Møgulig onnur valevni høvdu havt ilt við at fingið fatur á hesum pengum, tí teir tá høvdu farið aftur til flokkin fyrst.

626 milliónir

Sambært NBC News hevði Biden 31. mai góðar 91 milliónir dollarar á kontu til at reka valstríð. Tað svarar til góðar 626 milliónir krónur.

Tað er ongantíð fyrr hent, at eitt forsetavalevni hevur tikið seg aftur. Í 1972 tók varaforsetavalevnið  Thomas Eagleton seg aftur, og tá valdi forsetavalevnið George McGovern eitt nýtt varaforsetavalevni.