Eingin søkti kommunulæknastørv á Tvøroyri

Eingin umsøkjari var til tey bæði kommunulæknastørvini í læknamiðstøðini á Tvøroyri, sigur Petur Martin Hansen, deildarleiðari hjá Heilsutrygd. 

Freistin at søkja fór á midnátt. 

Størvini kundu setast sum føst, tíðaravmarkað størv ella avloysarastørv, og skuldu eftir ætlan setast 1. september ella eftir nærri avtalu við Heilsutrygd.

Hetta ger, at avloysarar vera framvegis í størvunum á Tvøroyri.

Uml. 1.160 borgarar eru skrásettir at hoyra til aðra viðtaluna, og umleið 1.400 borgarar hoyra til hina viðtaluna.

Í Suðuroyar læknadømi eru umleið 4.560 borgarar. Fýra kommunulæknastørv eru í læknadøminum, og í hinum báðum størvunum eru kommunulæknar í føstum starvi.