Meira latið í lønum

12,4 milliardir krónur vóru latnar í A-skattaðum lønum frá juli í fjør til juni í ár. 

Tað eru slakar 700 milliónir meira samanborið við undanfarna tíðarskeið, sum var frá juli í 2022 til juni í 2023.

Vøksturin er 5,8 prosent.

Og hann er størri hjá kvinnum enn hjá monnum, 7,7 prosent hjá kvinnunum og 4,6 prosent hjá monnunum.

Men menninir áttu tó 60 prosent og kvinnurnar 40 prosent av lønunum.

Hagstovan hevur endurskoðað og broytt lønarhagtølini.

Millum annað eru 300 milliónir komnar aftat í 2023, so lønirnar tað árið ikki vóru 11,9 men 12,2 milliardir krónur.

Vøksturin kemur av, at hagtølini nú eisini umfata arbeiðsgevarar, sum eru í føroysku altjóða skipaskrásetingini, FAS.

Teir eru mettir at vera partur av føroyska búskapinum.