Siglingin hjá Smyrli ávirkað av bráðfeingisumvælingum

"Berileiði á skrúvuakslinum í bakborði er farið, og tað mugu vit skifta beinanvegin," sigur Jóhan Petur Abrahamsen, virkandi rakstrarleiðari í Strandfaraskipum landsins. 

Tí verður ferðaætlanin hjá Smyrli ávirkað seinnapartin hósdagin og fyrrapartin fríggjadagin. 

Brekið varð staðfest í nátt. 

"Tá eitt sovorðið leiði fer, so kann tað gera stóran skaða á aksilin, um tað ikki verður skift, tí er neyðugt at gera umvælingina skjótast til ber."

Umvælingin fer í gongd í annaðkvøld, hóskvøldið, og tí verða túrarnir av Havnini klokkan 21.15 hóskvøldið og klokkan 07.00 av Krambatanga fríggjamorgunin ikki sigldir. 

"Ferðafólk, ið hava bílagt ferðaseðil til hesar túrar, mugu tí broyta ella bíleggja nýggjan ferðaseðil til aðra fráferð. Gongur sum ætlað, verður fyrsti túrur eftir umvælingina fríggjadagin kl 13:00 av Havnini," sigur  Jóhan Petur Abrahamsen, virkandi rakstrarleiðari hjá Strandferðsluni.