![](https://kvf.fo/sites/default/files/styles/myndasavn-width/public/454957597_1060710806057365_903223272783168115_n.jpg?itok=lL4KF-3I)
- Tíðindi, mentan og ítróttur
Stórur áhugi fyri Ítróttaháskúlanum í Suðuroy
Stórur áhugi fyri Ítróttaháskúlanum í Suðuroy
48 næmingar byrjaðu á heystskeiðinum hjá Ítróttaháskúlanum í Suðuroy mánadagin, og tey kunnu gleða seg til eitt hálvt ár við spennandi upplivingum. Men fyrst er introvika
![](https://kvf.fo/sites/default/files/styles/grein-ovasta-mynd/public/untitled_design_4_3.jpg?itok=2lz_--WO)
Mynd: Ítróttaháskúlin í Suðuroy á Facebook
14.08.2024 - 15:54
Mánadagin var fyrsti skúladagur á heystskeiðinum á Ítróttaháskúlanum í Suðuroy, og sambært Suðurrás, so sást hetta eisini aftur í Vági mánadagin, tá stór mannamúgva og hópurin av bilum vórðu savnað við næmingaheimið hjá Ítróttaháskúlanum.
Tilsamans 48 næmingar byrjaðu á heystskeiðinum í gjár, og fara teir at fáa upplivingar bæði í nærumhvørvinum hjá Ítróttaháskúlanum í Vági og eisini kring landið og á uttanlandsferð.
Sum vant byrjaði heystskeiðið við introviku, har næmingarnir læra hvønn annan at kenna.
Ítróttaháskúlin í Suðuroy er ein sera væl umtóktur háskúli, og sæst hetta eisini aftur í tilmeldingunum, bæði nú í heyst og til komandi várskeið.
Um Ítróttaháskúlan í Suðuroy
Ítróttaháskúlin í Suðuroy er ein fólkaháskúli, staðsettur í Vági, hvørs endamál er at veita ungdóminum kunnleika, fimi og arbeiðshættir, sum stuðla tí einstaka næminginum í fjølbroyttari persónligari menning.
Ítróttaháskúlin er skipaður sum partur av Háskúlanum í Suðuroy. Háskúlin eigur at virka fyri persónligar menning hjá tí einstaka, bæði í mun til evnini, ið undirvíst verður í, men eisini í mun til leiklutin hjá tí einstaka sum partur av einum felagsskapi og í samfelagnum.
Háskúlin kann m.a. bjóða út undirvísing innan ítrótt, list og mentan. Dentur verður lagdur á, at undirvísingin er á høgum støði við miðvísari menning av næminginum í huga. Háskúlin kann samstarva við aðrar skúlar, felagsskapir og stovnar í sambandi við undirvísingina.
Háskúlin er ætlaður ungum, sum eru liðug við fólkaskúlan, tvs. ungum, úr 10. flokki og eldri.
Nýggjastu sendingar í ÚV
Nýggjastu sendingar í SV