Stjórin í Faroe Music Export: Hetta gloppar nógvar dyr

Tað fer uttan iva at gloppa nógvar dyr til altjóða tónleikapallin fyri føroysk tónlistafólk, at Føroyar vera í fokus, tá kendi tónleikafestivalurin The Great Escape í Brighton, Onglandi, fer av bakkastokki í mai næsta ár.

Tað væntar Glenn Larsen, stjóri í Faroe Music Export (FMX).  

The Great Escape í Brighton verður roknaður sum størsti tónleikafestivalur av sínum slagi í Evropa. Talan er um ein tónleikavinnufestival, har umboð fyri tónleikaídnaðin úr øllum heiminum hittast. Á hvørjum ári eru 16.000 áhoyrarar og meira enn 4.500 umboð fyri tónleikavinnuna úr øllum heiminum á The Great Escape, har 450 av mest spennandi nýggju tónleikanøvnunum sleppa at vísa seg fram.

"Tónleikavinnufestivalar sum The Great Escape eru ein sera góð lopfjøl hjá nýggjum tónleikanøvnum út á altjóða tónleikapallin. Tað er ofta har, ið tey blíva uppdagað," staðfestir Glenn Larsen, stjóri í FMX,

Hann vísir á, at heimskend tónleikanøvn sum Adele og Ed Sheeran, Sigrid, Aurora, Rag’n’Bone Man, John Grant, Wet Leg, Charli XCX, Mø, Bastille, Christine & The Queens, Ben Howard, Bon Iver, Mumford & Sons, Highasakite og Laura Marling, fyri at nevna nøkur, hava gjørt júst tað - brúkt The Great Escape sum lopfjøl til eina tónleikayrkisleið. 

Aggrasoppar, The Great Escape

Tónleikarar sjálvir skapt møguleikan

Hóast lítla tónleikaútflutningsstovan FMX arbeiðir fyri at fáa føroyskan tónleik og føroysk tónlistafólk út um landoddarnar, so eru tað tónlistafólkini sjálvi, ið eiga heiðurin fyri, at Føroyar nú verða í fokus á The Great Escape næsta ár.

"Tey tónleikanøvn, ið áður hava luttikið á The Great Escape, hava verið dugnalig, professjonell og tískil staðið sterk í myndini, og tí hava vit í grundini fingið hendan gylta møguleikan."

Av teimum føroysku tónleikanøvnunum, ið hava luttikið á The Great Escape, kunnu nevnast Joe and the Shitboys, Aggrasoppar, Elinborg, Marius Ziska, FRUM, JazzyGold, Marianna Winter, Brimheim og Kóboykex. 

Hvørji tey átta tónleikanøvn, ið sleppa at umboða Føroyar á The Great Escape, vera, er ov tíðliga at siga enn. 

"Tað er heilt og heilagt fólkini hjá The Great Escape, ið avgera tað," staðfestir Glenn Larsen. 

"Men øll tónlistafólk og - nøvn, ið ynskja at luttaka á The Great Escape, noyðast at søkja um tað, og tá er tað uttan mun til, um tú eitur Adele ella Ed Sheeran."