Oljudálking í Grønlandi

Oljuhinna hevur lagt seg á fleiri grønlendskar firðir nærhendis Nanortalik, á vestursíðuni á suðurendanum á Grønlandi.

Hóast oljusperrur eru lagdar út, har skipið “Adolf Jensen” sakk í fyrradagin, sigur politiið í Grønlandi talan vera um rættiliga oljudálking.

Grønlendska kringvarpið KNR skrivar, at skipið hevði millum 15 og 20.000 litrar av dieselolju í tanganum, umframt einar túsund litrar av motorolju.

“Adolf Jensen”, sum áður hevur verið havrannsóknarskip, rendi hósnáttina á eitt sker og fekk so mikið av skaða, at tað sakk tíðliga hósmorgunin.

Manningin kom snikkaleys frá tilburðinum og fekk bjargað sær til lands.