Útflutningurin veksur og innflutningurin minkar

Innflutningurin minkaði, men útflutningurin vaks fyrstu átta mánaðirnar í ár, vísa tøl frá Hagstovuni.

Tá skip og flogfør eru íroknað, minkaði innflutningurin 511 milliónir samanborið við somu tíð í fjør, t.e. 11 prosent.

Innflutt varð fyri 4,3 milliardir krónur samanborið við 4,8 milliardir í fjør.

Í fjør innfluttu vit skip og flogfør fyri, 1,3 milliardir krónur, men higartil í ár hevur hesin innflutningurin verið 810 milliónir kr.

Innflutningurin av brennievni eru minkaður 15 milliónir í ár niður í 870 milliónir, men innflutningurin til beinleiðis nýtslu er vaksin 34 millónir, upp í 775 milliónir kr.

Útflutningurin fyrstu átta mánaðirnar er vaksin 349 millónir kr., t.e. 10 prosent, samanborið við í fjør.

Hann var tilsamans 3,7 milliardir krónur frá januar til august.

Útflutningurin av alifiski vaks 478 milliónir kr upp í 1,6 milliardir kr.

Útflutningurin av botnfiski minkaði 60 milliónir kr., niður í 867 milliónir, og útflutningurin av uppsjóvarfiski minkaði 107 milliónir, niður í 620 milliónir krónur.

Tilsamans útfluttu vit 233.700 tons av fiski og fiskavørum fyrstu átta mánaðirnar í ár, og tað eru 1.630 tons fleiri enn somu tíð í fjør.