Fyrstu línuskipini fara nú á Bankan

Stóru línuskipini í bólki-3 eiga 40 fiskidagar tilsamans á Føroyabanka.

Tá veiðiloyvini í bólkinum eru heili 21 í tali, so eru bara tveir fiskidagar í part, og tí eru fyrstu avhendingar av fiskidøgum á Føroyabanka eisini longu farnar fram, at kalla samstundis sum loyvini at royna á Føroyabanka verða útskrivað frá Vørn. 

Higartil eru fiskidagarnir á Føroyabanka savnaðir á tvey línuskip, tey eru Stapin og Klakkur. 

Men enn eru tó ikki øll føroyabanka-loyvi hjá línuskipunum útskrivað.

Stapin, línuskip

Stapin.

Klakkur

Klakkur.

Útróðrarbátar longu verið á Bankanum

Kunngerðin, sum skipar fiskiskapin á Føroyabanka í ár, gevur línuskipunum 40 fiskidagar á bankanum, stóru útróðrarbátarnir í bólki-4 fáa tilsamans 135 fiskidagar og smærru útróðrarbátarnir í bólki-5 fáa tilsamans 90 fiskidagar á Føroyabanka.

Meðan línuskipini hava roynt aðrar leiðir, so hava útróðrarbátarnir longu verið á Føroyabanka. Avreiðingarseðlarnir, ið Vørn savnar, geva eina mynd av fiskiskapi og prísi.

Størru útróðrarbátarnir í bólki-4 hava fiskað 282 tons á bankanum. Av hesum eru 111 tons toskur, 91 tons hýsa og restin longa, brosma og havtaska. Fiskurin av Føroyabanka er avreiddur fyri góðar 6,9 milliónir krónur, tað eru smáar 25 krónur/kilo.

Útróður, lína, línustampur, stampur

Føroyabanki hevur síðstu árini verið eitt gott ískoyti hjá línuskipum og útróðrarbátum.

Smærru útróðrarbátarnir í bólki-5 hava fiskað tilsamans 323 tons á Føroyabanka. Av hesum eru 227 tons toskur og 45 tons hýsa. Avreitt er fyri góðar níggju milliónir krónur, tað eru áleið 28 krónur/kilo.

Sambært Vørn skal fyrivarni tó takast fyri tølunum, tí ikki er vist, at allir avreiðingarseðlar eru tiknir við í almennu tølini enn.

Nærum allir dagar brúktir

Vørn upplýsir, at nærum allir fiskidagar á Føroyabanka hjá hesum bólkum brúktir. 14 fiskidagar eru eftir í bólki-4, og 10 dagar eru eftir í bólki-5.

Føroyabanki hevur síðstu árini verið eitt gott ískoyti hjá línuskipum og útróðrarbátum. Í fjør fiskaðu tey góð 1700 tons á Føroyabanka, ið vórðu avreidd fyri góðar 42 milliónir krónur. Av hesum vóru góð 900 tons toskur, sum varð avreiddur fyri 30 milliónir krónur.