Framtíð Føroya í Norðurlondum avgjørd fyrrapartin

Fyrrapartin fer Norðurlandaráðið at viðgera og atkvøða um dagføringarnar í helsingforssáttmálanum, grundlógini hjá norðurlendska samstarvinum.

Ein uppskotin dagføring er at geva Føroyum, Álandi og Grønlandi fullan limaskap í Norðurlandaráðnum. 

Grønland boykottar longu nú Norðurlandaráðið, sum í hesari vikuni hevur ársfund í Reykjavík.

Tað ger landið, tí Føroyar, Áland og Grønland ikki sleppa við á týðandi fundir hjá ráðnum. 

Grønland er ikki við á fundinum í Reykjavík.

Grønlendska landsstýrið endurskoðar nú lut Grønlands í norðurlendska samstarvinum. 

Føroyar eru við - enn

Føroyar eru við í Reykjavík, hóast støða Føroya er tann sama sum tann grønlendska.

Men Aksel V. Johannesen, løgmaður, hevur sagt, at verður broytingin í helsingforssáttmálanum ikki samtykt, eru Føroyar heldur ikki við í Norðurlandaráðnum longur.

Hann endaði røðu sína á ársfundinum týsdagin við orðunum:

"Enten er vi helt med, eller også er vi slet ikke med."

Antin eru vit við í øllum, ella eru vit als ikki við.