Andras Mortensen fær virðisløn M.A. Jacobsens fyri yrkisbókmentir 2024

Virðisløn M.A. Jacobsens fyri yrkisbókmentir 2024 verður latin Andrasi Mortensen fyri bókina "Kongsbókin og lógir føroyinga í hámiðøld". 

Í grundgevingini fyri at lata Andrasi Mortensen virðislønina stendur, at í bókini hevur Andras skrivað av og hegnisliga týtt allan tekstin í Kongsbókini, sum er einasta skinnbók, ið er varðveitt í Føroyum.

Við hesum avrikinum hava øll nú lætta atgongd til alt tað, sum stendur í elstu skrivligu kelduni um Føroyar.

Í Kongsbókini eru tær lógir, sum vóru galdandi fyri Føroyar, og nakrir kapitlar, har Andras greiðir frá innihaldinum í Kongsbókini, frá søguni hjá ymisku lógartættunum og hvat alt hetta sigur okkum um Føroya støðu í ríki Noregs kongs.

Samanlagt fáa vit við nýggju Kongsbókini nógv dyggari innlit í elstu keldur okkara, og tað gevur góðar møguleikar at skilja elstu søgu okkara á nýggjan hátt, stendur í grundgevingini. 

Í sínum ummæli av "Kongsbókin og lógir føroyinga í hámiðøld", ið stendur at lesa á In.fo, so kallar Magni Arge bókina fyri eitt meistaraverk. 

"Útgávan er ætlað leikum og lærdum, sum hava áhuga fyri máli, mentan, søgu og rættarsøgu. Andras hevur syrgt fyri, at vit kunnu lesa upprunatekstin við prentskrift, og so hevur hann eisini týtt forna málið til nútíðar føroyskt, so tað er lættari atkomuligt."

Magni Arge, In.fo 14.02.2024

Andras Mortensen, Virðisløn M. A. Jacobsen fyri yrkisbókmentir

Mynd: Ólavur Frederiksen