Tað skal bera til at byggja bílígari, samstundis sum góðskan er í lagi

Kostnaðurin kann fáast munandi niður við at byggja einkult og við at minka um óneyðugt spillpláss mest møguligt, sigur Albert Isfeld, ið hevur lagt seg eftir at tekna eini hús, har ið góðskan er í lagi, dentur er lagdur á tað estetiska og vakra, samstundis sum funktiónin í húsinum skal vera í lagi. Eisini er hædd tikin fyri møguligari bygging, sum er har frammanundan, eins og landslagnum, umhvørvinum og klassiskum og søguligum medviti.

Í stovuhæddini, ið er umleið 72 fermetrar til støddar, er inngongd og durur, eitt kamar, baðirúm, og stova og køkur í einum. Húsini hava tekju, ið hellur annan vegin, og tí verður loftið umleið 30 fermetrar stórt, samstundis sum tað verður høgt til loftið í stovuni. Á loftinum eru tvey kømur og eitt baðirúm. Harumframt ber til at gera eitt rúm afturat, skuldi tørvur veri á tí. Eisini hava húsini hjall og úthús.

Albert Isfeld - Domus Mini, plantekningar, fasadur og tvørskurður.jpeg

Domus Mini, ið eru 103 bruttofermetrar til støddar umframt úthús, ið er 9 fermetrar stórt

Húsini, ið Albert Isfeld nevnur Domus Mini, kunnu byggjast sum støk sethús, raðhús ella randarhús. Eisini hevur Albert Isfeld teknað minstu húsini við einum útbygningi, ið nevnist Domus Midi.

Albert Isfeld - Domus Mini, plantekningar og fasadur.jpeg

Hesar tekningarnar eru av Domus Midi, ið er 117 bruttofermetrar til støddar umframt úthús, ið er 9 fermetrar

Albert metur, við einum ávísum fyrivarni, at húsini kunnu byggjast fyri umleið 2 milliónir krónur umframt grundøki.

Ein av teimum stóru avbjóðingunum í Føroyum er høgi kostnaðurin, tá tú skalt byggja, keypa ella leiga tær ein bústað. Og hetta hevur nógvar trupuleikar við sær hjá teimum, ið skulu keypa ella byggja fyri fyrstu ferð. Tí setti Albert Isfeld, sum hevur starvast sum arkitektur í eina hálva øld, sær fyri at tekna eitt sethúsa- og íbúðarmodell, ið gjørdist so bíligt sum møguligt, samstundis sum útsjónd, funktión og góðska eru í lagi.

Albert Isfeld - Domus Mini, plantekningar og fasadur.jpeg

Her síggjast Domus Mini sum bæði støk sethús og raðhús