Rukku ikki minstamarkinum fyri javnstøðu

Tað eydnaðist ikki at røkka minstamarkinum fyri javnstøðu á kommunuvalinum hesa ferð.

Nú allar atkvøður eru taldar, eru 134 menn og 67 kvinnur vald í bý- og bygdaráðini í landinum.

Av teimum valdu eru tveir triðingar menn og ein triðingur kvinnur.

Niels Uni Dam

Niels Uni Dam er formaður í Demokratia. (Mynd: Bjarni Árting Rubeksen)

Sjónlig afturgongd

Í Runavíkar kommunu er afturgongdin av kvinnum í kommunustýrinum sjónlig.

Í 2020 vórðu fýra kvinnur valdar í býráðið í Runavík og sjey menn. Í ár er ein kvinna vald og 10 menn. 

Tað er Sigrun Jónsveinsdóttir.

Sambært henni hevði tað verið ynskiligt, at fleiri kvinnur blivu valdar, og at javnstøða var í býráðnum.

Men tá tað nú einaferð er soleiðis, sigur Sigrun Jónsveinsdóttir:

- Eg má í hvussu er arbeiða hart fyri teimum málunum, sum eg havi sett mær fyri. 

Sigrun Jónsveinsdóttir - mynd av Facebook

Sigrun Jónsveinsdóttir.(Mynd av Facebook-vanga)

Kundi gerast søguligt

Ársins kommunuval hevði møguleika at gerast søguligt fyri javnstøðuna í føroyskum kommunalpolitikki.  

Ongantíð hava so nógvar kvinnur stillað upp til val. Men soleiðis bleiv ikki.  

Úrslitið er ikki bert uttan fyri minstamarkið fyri javnstøðu, sum er 60/40.

Tað er eisini ein afturgongd síðani seinasta kommunuval í 2020.

Tá vórðu 36 prosent kvinnur valdar í kommunustýrini í Føroyum. Hetta merkir, at tað eru næstan trý prosent færri kvinnur, sum eru valdar hesa ferð.

Í Hvannasunds og Skúvoyar kommunu vóru ongar kvinnur valdar inn. 

Hoyr innslagið við Sigrun Jónsveinsdóttir, sum er einsamøll kvinna í býráðnum í Runavík, og Niels Una Dam, formann í Demokratia, sum greiða frá úrslitinum.