Vápnahvíldin kom í gildi í nátt

Klokkan tvey í nátt okkara tíð kom vápnahvíldin millum Ísrael, Libanon og Hisbollah í gildi.

Partarnir hava higartil hildið avtaluna um vápnahvíld, sigur tíðindafólkið hjá DR í Miðeystri, Puk Damsgård. Hon er í libanska høvuðsstaðnum Beirut.

- Tað vóru nøkur ísraelsk luftálop beint fyri klokkan 04 lokala tíð, tá vápnahvíldin skuldi koma í gildi. Men síðani hevur einki álop verið, sigur hon.

USA hevur fingið semjuna um vápnahvíld í lag, og Frakland hevur hjálpt til.

Hizbollah-rørslan hevur tó ikki sagt enn, um hon viðurkennir avtaluna. Men tað fara næstu tímarnir at vísa, skrivar Reuters.

Avtalan sigur millum annað, at ísraelski herurin og Hisbollah skulu taka seg úr Suðurlibanon.

Kríggið millum Ísrael og libansku Hisbollah-rørsluna, sum er á yvirgangslistanum hjá ES og USA, hevur vart í okkurt um 14 mánaðir.

Vápnahvíldin millum partarnar skal slóða fyri, at kríggið í Gasa endar, siga franski forsetin, Emmanuel Macron, og amerikanski forsetin, Joe Biden.