Innflutningurin minkaði hálvaðru milliard

Innflutningurin er eins og útflutningurin minkaður.

Og hann er minkaður nakað væl meira enn utflutningurin. 

Innflutt var fyri 10,2 milliardir krónur frá desember 2023 til november 2024. 

Tað eru hálv onnur milliard krónur, ella 13 prosent, minni enn undanfarna skeið, skrivar Hagstovan.

Bíligari olja

Millum annað sæst væl í innflutningstølunum, at oljan er vorðin bíligari.

Innflutningsvirðið á brennievni minkaði 300 milliónir krónur.

Ikki bara prísurin er orsøkin, eisini verður minni innflutt.

Innflutningstølini vísa, at akfør brúka minni bensin og diesel. 

Eisini verður minni innflutt til upphiting og til skip. 

Innflutningur úr ES

Innflutningurin úr ES er nú aftur tann sami sum fyri 2022. 

Árini 2022 og 2023 var innflutningurin úr ES millum 500 og 600 milliónir krónur um mánaðin. 

Innflutningurin úr londum í Evropa, sum ikki eru í ES, er farin úr 100 milliónum krónum um mánaðin upp í 150 og 200 milliónir krónur um mánaðin. 

Innflutningurin úr Asia hevur verið tann sami nógvu seinastu árini, skrivar Hagstovan.