Lavrov: Samrøðurnar vóru góðar

Samrøðurnar vóru góðar, og partarnir skiltu hvør annan.

Tað sigur russiski uttanríkisráðharrin, Sergej Lavrov, eftir fundin við amerikanska starvsbróður sín, Marco Rubio, í Saudiarabia í dag.

Lavrov heldur eisini, at USA skilir betur støðuna hjá Russlandi. Tað sigur hann sambært Reuters.

- Eg haldi, at amerikanarar skilja okkum betur nú. Vit hava út í æsir greitt teimum frá og givið teimum ítøkilig dømi um tað, sum Putin, forseti, fleiri ferðir hevur sagt, sigur Sergej Lavrov.

Sergej Lavrov vil ikki, at Evropa skal senda herdeildir til Ukraina.

Zelenskyj í Turkalandi

Ukrainski forsetin, Volodymyr Zelenskyj, heldur í løtuni tíðindafund í Turkalandi saman við turkiska forsetanum, Recep Tayyip Erdoğan.

Á tíðindafundinum mótmælir Zelenskyj enn einaferð, at samráðingar verða hildnar um Ukraina, uttan at Ukraina er við á fundinum.

Recep Tayyip Erdoğan bjóðar Turkaland fram sum møguligt stað at halda ítøkiligar friðarsamráðingar.