Reiðarar og Fíggjarmálaráðið ósamd um, hvussu veiðigjald skal tulkast

Hóast meirilutin í fíggjarnevdini, tað er samgongan, tekur undir við, at veiðigjaldið er tað sama, hóast kvoturnar minka, hevur hann nakrar viðmerkingar um ætlanina hjá landsstýrinum.

Í lógini, sum nú er, stendur, at veiðigjaldið minkar eina helvt, tá kvotan minkar meira enn helvtina.

Meirilutin sigur, at reiðarar og Fíggjarmálaráðið eru ikki samd um, hvussu greinin um veiðigjald skal tulkast. 

Meirilutin heldur, at tað er óheppið, um landsstýrið í 2020 hevur givið Reiðarafelagnum ta fatan, at tað ber til at avtala ásetingar um tilfeingisgjøld við eitt landsstýri, sum umboðar ein smalan meiriluta í politisku skipanini, og hetta so skal vera galdandi í allari framtíð. 

Andstøðan mælir frá

Andstøðan í Fíggjarnevndini mælir tinginum frá at samtykkja uppskotið hjá Fíggjarmálaráðnum.

Fíggjarnevndarlimirnir hjá andstøðuni halda, at karmarnir hjá fiskivinnuni skulu vera støðugir.

Tí vinnan eigur at vita, hvussu hon eigur at bera seg at.

Grundleggjandi broytingar eiga ikki vera gjørdar við stuttum millumbilum.