Valforkvinnan eigur seinastu atkvøðuna

Beint eftir klokkan hálvgum nýggju, lokala tíð, lat Bea Mølgaard Lennert sína atkvøðu í kassan, og harvið endaði valið í Nuuk

-Eg havi ikki upplivað slíkan áhuga fyri valinum sum hesaferð, segði Bea Mølgaard Lennert, valforkvinna á valstaðnum í Nuuk, við riðilin av fjølmiðlafólki, tá hon formliga endaði valið.

Í Grønlandi er siður, at valforkvinnan fyrst rópar í hátalaran, um nakar manglar at greiða atkvøðu. Um eingin er eftir, fer hon sjálv inn í valrúmið at greiða atkvøðu, og síðani er valið av.

Tað gjørdi Bea Mølgaard Lennert beint eftir klokkan hálvgum níggju, lokala tíð.

Hóast hon tá ikki kendi endaligu tølini, so var forkvinnan á valstaðnum sannførd um, at valluttøkan hesaferð er størri enn seinast. 

-Eg havi eina greiða ábending um, at valluttøkan fer upp um 70 prosent, segði Bea Mølgaard Lennert, tá hon hevði greitt atkvøðu.

Endaliga valluttøkan á valstaðnum í Nuuk er ikki kunngjørd enn. Men við Kringvarpið nú sigur valforkvinnan, at valluttøkan sær út til at vera 66 prosent, umframt brævatkvøðurnar. Hetta skal tó takast við fyrivarni. 

Hon roknar við, at tey eru liðug at telja atkvøðurnar umleið á midnátt. 

Eisini í Sisimiut er valið av. Har settu 3947 fólk krossin, og tað eru 73,7 prosent av teimum, sum hava valrætt. Á valinum fyri fýra árum síðani var vallutøkan í Sisimiut 61,6 prosent. 

Tilsamans 40.369 fólk hava valrætt til grønlendska landstingið, Inatsisartut. Seks flokkar stilla upp og kappast um teir 31 tingsessirnar í Inatsisartut.