Fleiri mál, men færri klagur

Brúkaraumboðið skrásetti 229 mál í fjør, 35 fleiri enn í 2023.

Tey 229 málini vóru 50 kærur og eftirlitsmál, 153 fyrispurningar, fráboðanir og forhandarmetingar og 26 mál av øðrum slagi. 

Hóast málstalið er hækkað, eru nakað færri klagur.

Men forhandarmetingarnar eru vorðnar fleiri.

Vinnurekandi kunnu biðja Brúkaraumboðið meta, um ætlað marknaðarføringartiltøk eru lóglig ella ikki. 

Brúkaraklagunevnd

Brúkaraumboðið hevur í nógv ár víst á tørvin á einari brúkaraklagunevnd. 

Í fjør hevði Brúkaraumboðið fund við táverandi landsstýrismann í uttanríkis- og vinnumálum, Høgna Hoydal, um málið. 

Eftir fundin sendi Brúkaraumboðið eitt upprit til landsstýrismannin um at stovna brúkaraklagunevnd.

Landsstýrismaðurin vísti áhuga, men eingir pengar eru í fíggjarlógini fyri 2025. 

Ein brúkaraklagunevnd kann bæði mekla og vera klagunevnd, ella bara annað. 

Støða skal takast til tað. Brúkaraumboðið arbeiðir víðari við málinum.