Undrast á at føroysk og grønlendsk umboð leggja seg út í danskan politikk

(Dagføring kl. 14:53)

Andstøðan í Danmark fer nú alíkavæl at leggja fram misálit á Lars Aagaard, veðurlagsráðharra, skrivar DR.

Tað undrar bæði politiskar viðmerkjarar og politikarar í Danmark, at føroysk og grønlendsk fólkatingsumboð leggja seg út í danskan innanríkispolitikk.

Andstøðan í fólkatinginum arbeiddi við møguleikanum at leggja fram uppskot um misálit á Lars Aagaard, ráðharra í veðurlagsmálum, eftir at hann tilvitað hevur hildið aftur upplýsingar í sambandi við grøna orkuskiftið í Danmark.

Lars Aagaard

Lars Aagaard. (Mynd: Ritzau Scanpix)

Men føroysku fólkatingslimirnir, Sjúrður Skaale og Anna Falkenberg,  hava saman við grønlendska fólkatingsliminum, Aaju Chemnitz, í tíðindaskrivi boðað frá, at tey stuðla Lars Aagaard í hesum málinum, og sostatt verður ikki meiriluti fyri misáliti á ráðharran.

Málið hevur elvt til bæði undan og atfinningar í fólkatinginum, tí tað er ikki vanligt, at norðuratlantisku umboðini leggja seg beinleiðis út í donsk viðurskifti.

Bent Winther

Bent Winther. (Mynd: Berlingske)

Bent Winther, politiskur viðmerkjari hjá Berlingske, sigur við DR, at danska stjórnin hevur ikki longur beinleiðis meiriluta í innanríkismálum, og tí verða óvanlig stig tikin í valdsstríðnum millum stjórnina og andstøðuna.

Torsten Gejl

Torsten Gejl. (Mynd: Ritzau Scanpix)

Torsten Gejl, framsøgufólk hjá Alternativet í veðurlagsmálum, sigur við DR, at hann heldur tað vera óhóskandi uppílegging í danskan innanríkispolitikk.

Hoyr innslag í í útvarpstíðindunum: