Viðmerkjari: Pensjónsmálið tikið aftur og tunnilin fer í nevnd

Beinta Løwe, politiskur viðmerkjari, væntar, at uppskotið um at hækka pensjónsaldurin verður tikið aftur, og at málið um Suðuroyartunnilin verður beint aftur í fíggjarnevndina.

Tað segði hon í eyka tíðindasendingini í útvarpinum klokkan 10.

Beinta Løwe sigur, at verður eitt mál tikið aftur, skal løgtingsforkvinnan spyrja, um nakar annar ætlar at leggja uppskotið framaftur. Og tað ivast hon í, at nakar fer at gera.

Verður málið um Suðuroyartunnilin tikið aftur, eru størri sannlíkindi fyri, at onkur biður um at leggja tað framaftur. Fer málið aftur í nevnd, hendir einki, og so dettur tað burtur, tá henda tingsetan er av á ólavsøku. 

Beinta Løwe væntar ikki, at løgtingsforkvinnan fer at taka málini av skránni og síðani senda tingið í summarfrí.

Tá tingfundurin var settur um hálvgum tíggju tíðina, var hann niðurlagdur.

Bjørt Samuelsen, løgtingsforkvinna, boðaði frá, at arbeitt verður við broytingaruppskotum, og tingfundurin verður tikin uppaftur klokkan 11.

Hoyr samrøðu, sum Sigurjón Einarsson gjørdi við Beintu Løwe í tinginum: