Hákun skal spæla Champions League finalu

Føroyski landsliðsvongurin, Hákun West av Teigum, og liðfelagar hansara í Füchse Berlin, hava spælt seg í Champions League finaluna.

Tað gjørdu teir, tá teir vunnu við 10 málum móti franska felagnum Nantes í týska býnum Köln, har finaluumfarið í Champions League verður hildið.

Føroyingurin hevði tvey skot í dystinum og skoraði upp á bæði.

Hákun West av Teigum er fyrsti føroyingur sum skal spæla í einari Champions League finalu.

Mótstøðuliðið hjá Füchse Berlin í finaluni verður antin Barcelona ella Magdeburg, sum spæla beint nú.