Samskiftistøknin hjá løgregluni riggar ikki í Húsareynstunlinum

Húsareynstunnilin letur upp í morgin. Tunnilin er partur av nýggja innkomuvegnum, sum hevur fingið heitið Havnarvegur.

Tunnilin er 1,8 kilometur langur og er trygdargóðkendur eftir N 500 standardum sigur Heini Østerø, sløkkiliðsleiðari. 

Tað er tó ein trupulleiki, og tað er, at løgreglan kann ikki tosa saman við síni samskiftisútgerð, sum eitur KIMA, um tørvur skuldi verið á tí í samband við hending í tunlinum.  

Í staðin mugu tey koyra til nærmastu neyðtelefon í tunlinum og á tann hátt fáa samband við alarmsentralin. Tað sigur Heini Østerø. 

Orsøkin er ósemja millum Føroya Tele og Tórshavnar Kommunu um, hvør skal rinda fyri 4G ella GSM inni í tunlinum. 

Meðan Sløkkiliðið nýtir  eina sokallaða OF útgerð til sítt samskifti, sum er eitt radiosamband, brúkar skipanin hjá åpolitinum GSM.

GSM er ikki í tunlinum, og Føroya tele vil ikki rinda fyri at seta tað upp i tunlinum - tað skal kommunan gera, sigur Føroya Tele.

Tað vil Heini ØSterø ikki - GSM er ikki eitt krav fyri at trygdargóðkenna tunnilin, og tí er hann trygdargóðkendur uttan.

- Løgreglan rindar longu fyri hald hjá Føroya Tele og tað gera vit onnur eisini - kommunan fer ikki at fíggja at 4g verður sett uppí tunnilin, tað kann Føroya Tele gera, sigur hann. 

Tað eru Løgreglan, Sløkkilið og Politi, sum trygdargóðkenna tunnilin.