Amerikanskir kavbátar til russiska markið

Amerikanski forsetin, Donald Trump, fer at senda tveir kjarnorkukavbátar til russiska markið. Tað skrivar hann á sínum egna sosiala miðli, Truth Social. Hann skrivar tó ikki, júst hvar kavbátarnir skulu sendast.

Donald Trump skrivar, at hann hevur tikið hesa avgerð eftir nakrar viðmerkingar frá fyrrverandi russiska forsetanum og forsætisráðharranum, Dmitrij Medvedev á miðlinum X. Medvedev er eisini næstformaður í russiska trygdarráðnum.

Á X skrivar Medvedev, at Donald Trump kemur við støðugum krøvum og hóttanum, ið bara kunnu tulkast sum nøkur stig til kríggj.

Donald Trump hevur hótt Russland við fleiri revsitiltøkum og hevur stytt tíðarskeiðið til ein friðaravtala skal vera fingin í lag millum Russland og Ukraina - freistin er skorin úr 50 døgum niður í 10.