Áarføri førdi til skitið vatn í Sandagerði

Í síðstu viku vístu vatnkanningar, at ov nógvar bakteriur vóru í vatninum í Sandagerði og í Sandá. Kanningarnar staðfestu bæði E. coli og enterokokkar, sum eru bakteriur í langanum hjá súgdjórum. Úrslitið førdi til reyð fløgg og at Tórshavnar Kommuna ráddi borgarum til at vísa serligan ans. 

Kanningarnar vóru gjørdar hósdagin 7. august, stutt eftir, at serliga nógv regn hevði verið. Hetta áarførið førdi til, at ov nógvar bakteriur vóru funnar á fleiri støðum, har fólk plaga at dippa.

Nú eru nýggjar kanningar gjørdar, og úrslitið: Grøn fløgg og vatngóðskan er góð aftur.