Tvørmegi er nú ítróttafelag

Í meir enn tíggju ár hava tey íðkað crossfit - nú er Tvørmegi stovnað sum ítróttafelag.

 - Tað, sum vit hava saknað, er møguleikin at kappast sum ítróttafelag og fara til altjóða kappingar í tí nýggja ítróttinum, sum eitur functional fitness, sigur Eyðun Hentze Højgaard, næstformaður í nýstovnaða felagnum, sum heldur til í Havn.

Functional Fitness er crossfit - ella rørslumegi - skipað eftir evropeiskum leisti. Ítróttin tekur seg fram í øllum heiminum, og ætlanin hjá nýggja felagnum er at fáa fleiri føroyingar - serliga tey ungu - í gongd.

 - Vit ætla at varpa ljós á hendan ítróttin. Vit ætla at vera við til skúlaleikir, vit ætla at fáa ungdómin við. Vit eru nokk so nógv tilkomin fólk í Tvørmegi, so tað hevði verið stuttligt at fingið hópin eitt sindur størri, sigur Jóhanna av Steinum, nevndarlimur og íðkari í Tvørmegi.