Stórar broytingar skulu gerast í prísskipanini hjá Bygdaleiðum

Stórar broytingar eru á veg í prísskipanini hjá Bygdaleiðum.

Tað sæst í svari frá Jóhan Christiansen, landsstýrismanni, til Jóhannis Joensen, løgtingsmann.

Tær koma, tá Bygdaleiðir verða bodnar út aftur í 2027.

Ikki samleika- ella borgarakort

Jóhannis Joensen spurdi millum annað, um ætlanin er at skilja millum útlendingar og fastbúgvandi føroyingar, tá Bygdaleiðir selja ferðaseðlar.

Jóhan Christiansen svarar, at eins og á Oyggjaleiðum er ætlanin at skilja millum búsitandi og onnur, so tey, sum ikki eru búsitandi, rinda meira enn tey, sum eru búsitandi. 

Ætlanin er tó ikki at brúka samleikakort ella borgarakort. 

Miðast skal eftir, at viðurskiftini eru avgreidd, áðrenn ferðafólkini fara í bussin. 

Prísskipanin 12 ára gomul

Verandi prísskipan hjá Bygdaleiðun er 12 ára gomul. 

Allir prísir hækkaðu fimm krónur í apríl í ár.

Samanborið við hini Norðurlondini eru prísirnir fyri almenna ferðslu í Føroyum lágir, sigur landsstýrismaðurin.

Les alt svarið her.