Eingin niðurstøða um Galaxy

Sjóvinnustýrið er enn ikki komið til nakra niðurstøðu í málinum um Galaxy, tað vil siga um málið skal meldast til løgregluna ella ikki. Ein mynd vísir, at Galaxy sigldi við opnum hekkuportri, hin 1. september. Strandferðslan heldur ikki, at nakað eigur at vera gjørt:

Stendur tað til rakstrarleiðaran á Strandferðsluni, so skal einki gerast við málið um hekkuportrið á Galaxy.

Kringvarpið hevur fingið innlit í frágreiðing, sum rakstrarleiðarin á Strandferðsluni, Niels J. Nielsen, hevur skrivað og sent Sjóvinnustýrinum. 

Hann skrivar millum annað til endans, at 

SITAT: 
...hetta hevur ávirkað griksku manningina nógv, tey eru ein stolt sjófartstjóð við eini fleiri 1000 ára sjófartssøgu. 
...Skiparin er 75 ár og ein sera dugnaligur og ábyrgdarfullur maður, har er einki at finnast at, alt er eitt hundrað prosent væl úr hondum greitt,
...vit hava ongan rætt til at seta spurnartekin við sjómanssøguna og dugnaskapin hjá øðrum. 

Hans Johannes á Brúgv, stjóri á Sjóvinnustýrinum, kemur aftur úr feriu mánadagin, og varaleiðarin, Jákup Kristian Poulsen, sigur, at Sjóvinnustýrið enn ikki hevur tikið støðu til, um málið skal meldast ella ikki. Hann væntar at tann avgerðin verður tikin í komandi viku.