Sorgarbólkar á miðnámi

Eftir heystfrítíðina verður møguligt hjá næmingum á miðnámi at koma í sorgarbólk.

Tað er studentapresturin, Ann Hermansdóttir, sum skal hava sorgarbólkarnar.

Sambært henni er tøvur á hesum tilboðnum til mimðnámsnæmingar, sum syrgja.

- Sorg er tað nokk av, so tørvurin er avgjørt til staðar. Tíverri er tað soleiðis, at eisini miðnámsnæmingar hava mist bæði foreldur, systkin og vinir, og tað ger sjálvandi nakað við tey, tað ger nakað við skúlagongdina, og tað ávirkar tey, sigur Ann Hermansdóttir.

Eitt nú í Danmark hevur mann góðar royndir við at hava sorgarbólkar fyri ungum á miðnámi. Hetta veit Ann Hermansdóttir eisini frá starvsfeløgum í Danmark. 

- Mann hevur góðar royndir við sorgarbólkum. Tá mann syrgir, so kann mann kenna seg einsamallan, og tað at koma saman í einum sorgarbólki, har mann deilir sínar upplivingar, er við til at gera, at mann kennir seg ikki sum tann einasta í verðini, ið hevur tað soleiðis, sigur Ann Hermansdóttir.

Sorgarbólkarnir, sum eru á Glasi og á Kambsdali, byrja eftir ætlan eftir heystfrítíðina og halda fram í sjey vikur.