SEV: Stóru virkini skulu gjalda meiri

Stórir ídnaðarkundar hjá el-felagnum SEV, sum brúka nógvan streym, skulu gjalda fimm oyru meira fyri kilowatttíman á nýggjárinum.

Tað ætlar SEV, sum fyrrapartin hevur havt eykaaðalfund á Hotel Føroyum, í sambandi við at fíggjarætlanin fyri 2014 skal samtykkjast.

SEV ætlaði longu í fjør at hækka prísin hjá stórum ídnaðarkundum við 11 oyrum, men semja var ikki um tað. Í fjør hækkaði prísurin við seks oyrum. Men nú verður roynt at fáa fimm oyru løgd afturat.

20.000 kilowatt-tímar

Jákup Suni Lauritsen, formaður í stýrinum fyri SEV, sigur við tíðindaportalin IN.fo, at talan er um ídnaðarvirki, sum brúka meiri enn 20.000 kilowatt tímar um árið, ið nú skulu rinda meiri fyri streymin.

Hesi ídnaðarvirki fara, um broytingin verður samtykt,sostatt at gjalda eina krónu og 15 fyri kilowatt-tíman eftir 1. januar.

Einki uppskot er um, at prísurin hjá privatu húsarhaldunum hækkar. SEV væntar at hava tríggjar milliónur krónur í avlopi í 2014.