Brandur: Eitt av teimum heilt stóru úrslitunum

 - Nú hava vit akkurát sungið inni í skiftingarrúminum, so nú fór pulsurin uppaftur.

Tað segði Brandur Hendriksson Olsen, sum metti sigurin á Kekkia at teljast millum teir størstu í føroysku landsliðssøguni. Miðvallarin var sjálvur við, tá Føroyar vunnu tvær ferðir á Grikkalandi í 2014 og 2015.

 - Vit spældu ein javnan dyst niðri í Kekkia, har teir avgjørdu dystin móti endanum, og í dag koppaði tað hinvegin, og vit skora beint eftir, at teir hava skorað, segði miðvallarin úr NSÍ.

Hanus Sørensen skeyt Føroyar framum miðskeiðis í seinna hálvleiki, men kekkar javnaðu 12 minuttir fyri leiklok, áðrenn innskifti Martin Agnarsson aftur avgjørdi ein landsdyst fyri føroyingarnar.

Brandur Hendriksson Olsen rósti spælarunum og fegnaðist um breiddina og styrkina á beinkinum.

 - Tað ger bara, at vit halda í 90 minuttir og ikki vikna sum lið, segði miðvallarin, sum sjálvur varð útskiftur, tá ein tími var spældur. Við úrslitinum halda Føroyar lív ein HM-vónini undan síðsta dystinum á útivølli ímóti Kroatia.

 - Vit síggjast í Amerika, smíltist Brandur H. Olsen til endans.