Bíligari hjá brúkaranum

Landsstýrið hevur gjørt av, at grønmeti og epli skulu frítakast fyri meirvirðisgjald. Uppskotið kemur til fyrstu viðgerð týsdagin í næstu viku. 

- Kundin fær vøruna bíligari, men bóndin fær ikki nakað eyka í sín part, sigur Jógvan Jón Petersen, bóndi í Stóru Dímun. 

Prísurin er spurningur millum seljara og kunda

Ottar Hentze, bóndi á Sandi, selur eplir og grønt í privatari sølu.

- Prísurin er ein spurningur millum meg og kundan. Góðskan á føroyska grønmetinum er nógv betri enn á tí útlendska, og tí má tað kosta meir, sigur Ottar Hentze.

Bóndahjúnini í Dímun hava lagt seg eftir at selja grønmeti til handlar.

- Vit hava ikki somu møguleikar at koyra út til kundan við vøruni, og tí selja við til handlar. Kundin rindar næstan tvífalt so nógv fyri vøruna, sum vit fáa frá handlinum. Vinningur hjá handlinum og meirvirðisgjald gera, at prísurin næstan tvífaldast, sigur Jógvan Jón Petersen.