Verjuavtala elvir til politiskt rumbul í Grønlandi

Nýggja verjuavtalan hjá donsku stjórnini hevur elvt til politiskt rumbul í Grønlandi.

Andstøðuflokkurin Naleraq, sum eisini er næststørsti flokkur í landstinginum, mótmælir avtaluni.

Tað skriva grønlendska og danska kringvarpið.

Seta fólkið í vanda

- Ætlanin hjá donsku stjórnini setur grønlendska fólkið í vanda, siga Pele Broberg, formaður í Naleraq, og Aki-Matilda Høegh-Dam, tinglimur fyri Naleraq, og sum í løtuni er í farloyvi úr danska fólkatinginum.

- Eg eri skelkað av, at hernaðarlig dubbing verður í Nuuk, sigur Aki-Matilda Høegh-Dam við grønlendska kringvarpið, KNR.

Grønland, Arktisk Kommando í Grønlandi

Arktisk Kommando í Grønlandi skal hava nýggja høvuðsstøð í Nuuk. (Mynd: Reuters/Ritzau Scanpix)

Atfinningarnar snúgva seg í høvuðsheitum um ætlanirnar at nyggja nýggja høvuðsstøð til Arktisk Kommando í grønlendska høvuðsstaðnum, Nuuk. Harumframt skal havnin í Nuuk útbyggjast við nýggjari kai til skipini hjá donsku verjuni.

Eisini skulu tvey arktisk skip og flogfør útvegast.

Øll hesi tiltøkini seta, sambært Aki-Matildu Høegh-Dam, fólkið í Nuuk í vanda, tí hernaðarlig øki verða í býnum, sigur hon við grønlendska kringvarpið.

Vivian Motzfeldt

Vivian Motzfeldt. (Mynd: Sermitsiaq)

Tóku ikki av

Samstundis finst hon at grønlendska landsstýrinum, Naalakkersuisut, sum - sambært henni - ikki hevur tikið grønlendska tingið við í verjuavtaluna, sum eigur at hava "løgfrøðiligar og fólkarættarligar avleiðingar fyri grønlendska landsstýrið", sum hon málber seg.

Grønlendska landsstýriskvinnan í uttanríkismálum, Vivian Motzfeldt, vísir aftur, at grønlendska tingið og flokkarnir ikki hava fingið møguleika at vera við í avtaluni. 

Sambært henni, hevur  Naleraq sjálvur gjørt av ikki at vera við í samráðingunum, ella at taka ímóti tilfari um samráðingartilgongdina, hóast tað hevur staðið teimum í boði.

Við verjuavtaluni, sum er gjørd í samstarvi við grønlendska landsstýrið, skal Danmark brúka 27,4 milliardir krónur til verjuna í Arktis og Norðurhøvum.